លោកឧត្តមសេនីយ៍ស្នងការ៖ ល្បែងស៊ីសងដែលជ្រកក្រោមស្លាកហ្គេមកំសាន្តត្រូវ បង្ក្រាបអោយអស់ និងអ្នកនៅពីក្រោយបទល្មើស នៅពីក្រោយជនល្មើស បទឧក្រិដ្ឋណាមួយ ទោះជាអ្នកណាក៏ដោយគឺត្រូវតែចាប់ខ្លួនភ្លាម
03-January-2020 | ដោយ ពលមនសិការ
ព្រះសីហនុ៖ នាព្រឹកថ្ងៃសុក្រ ៩កើត ខែបុស្ស ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៣ ខែមករា ឆ្នាំ២០២០នេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានដាក់បទបញ្ជាយ៉ាងមុតមាំថា ”ល្បែងស៊ីសងដែលជ្រកក្រោមស្លាកហ្គេមកំសាន្តត្រូវ បង្ក្រាបអោយអស់ និងអ្នកនៅពីក្រោយបទល្មើស នៅពីក្រោយជនល្មើស ឧក្រិដ្ឋណាមួយ ទោះជាអ្នកណាក៏ដោយគឺត្រូវតែចាប់ខ្លួនភ្លាម”។
លោកឧត្តមសេនីយ៍ស្នងការបានបន្ថែមថា សន្តិសុខ សុវត្ថិភាព សណ្តាប់ធ្នាប់ក្នុងខេត្តព្រះសីហនុទាំងមូល ជាគន្លឹះ និងបានដើរតួនាទីយ៉ាងសំខាន់ក្នុងការ ទាក់ទាញ រក្សាកំណើនភ្ញៀវ អ្នកវិនិយោគជាតិ និងអន្តរជាតិចូលមកក្នុងខេត្តព្រះសីហនុនេះហើយក៏ជាកិច្ចឆ្លើយតបទៅនិងអនុសាសន៍ដ៏ខ្ពង់ខ្ពស់របស់សមេ្តចអគ្គមហាសេនបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលលើកឡើងថា “អរគុណ សន្តិភាព”។ អញ្ជឹងទេ លោកឧត្តមសេនីយ៍ស្នងការ បានជំរុញអោយកងកម្លាំងសមត្ថកិច្ចជំនាញ ក្រោមឱវាទទាំងអស់ ត្រូវធ្វើអ្វីតាម ឋានានុក្រម គោរពច្បាប់ជាគោល ពង្រឹងនិតវិធីច្បាប់ មានសីលធម៌ល្អទន់ភ្លន់តែម៉ឺងម៉ាត់ និងជាពិសេសលោកក៏បានផ្តាំផ្ញើរអោយកងកម្លាំងទាំងអស់ ដាច់ខាតកុំនៅពីក្រោយ ជនល្មើស រឺបទល្មើសណាមួយអោយសោះ ជាដាច់ខាតត្រូវតែចាប់ខ្លួន។
លោកឧត្តមសេនីយ៍ស្នងការបានបញ្ជាក់ថា ប៉ុស្តិ៍នគរបាលរដ្ឋបាល អធិការដ្ឋានទាំងអស់ត្រូវបើកទ្វា២៤ម៉ោងលើ២៤ម៉ោង ទទួលបងប្អូនប្រជាពលរដ្ឋដែលមានបញ្ហាណាមួយត្រូវការដំណោះស្រាយជាបន្ទាន់ដើម្បីទប់ស្កាត់ ដោះស្រាយ និងបង្ក្រាបទាន់ពេលវេលា។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ មានប្រសាសន៍ទាំងនេះ ក្នុងខណៈពេលលោកឧត្តមសេនីយ៍ស្នងការធ្វើអធិបតីភាពក្នុងកិច្ចប្រជុំបូកសរុបលទ្ធផលការងារប្រចាំខែធ្នូ ឆ្នាំ២០១៩ លើកទិសដៅខែមករា ឆ្នាំ២០២០ និង សម្រួលភារកិច្ច ប្រកាសតួនាទីជូនមន្ត្រីនគរបាលជាតិ នៃស្នងការដ្ឋាននគរបាលខេត្តព្រះសីហនុ នៅសាលប្រជុំស្នងការដ្ឋាននគរបាលខេត្ត។
ក្នុងកិច្ចប្រជុំនេះលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានសម្រួលភារកិច្ច និងប្រកាសតួនាទីជូនមន្ត្រីនគរបាលជាតិ នៃស្នងការដ្ឋាននគរបាលខេត្តព្រះសីហនុដូចមានឈ្មោះខាងក្រោម៖
១.លោកវរសេនីយ៍ឯក ភុល ភស្តា អត្តលេខ១៥០១៣ ពី អធិការ នៃអធិការដ្ឋាននគរបាលក្រុងព្រះសីហនុ ជានាយរងការិយាល័យផ្សព្វផ្សាយអប់រំ។
២.លោកវរសេនីយ៍ទោ តី វិសាល អត្តលេខ២៦០៣៦ នាយរងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ ជាអធិការ នៃអធិការដ្ឋាននគរបាលក្រុងព្រះសីហនុ។
៣.លោកវរសេនីយ៍ទោ ហេង គីមអាន អត្តលេខ៦២៤០២ ពីនាយការិយាល័យស៊ើបអង្កេតនិងអនុវត្តនីតិវិធី ជាអធិការដ្ឋាននគរបាលក្រុងកោះរ៉ុង។
៤.លោកវរសេនីយ៍ទោ ជួន សុខា អត្តលេខ៥៤១៣៣ នាយរងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ ជានាយរងការិយាល័យគ្រប់គ្រងសន្តិសុខឯកជន ៕
ចំនួនអ្នកទស្សនា
- ថ្ងៃនេះ11901
- ម្សិលមិញ15681
- សប្តាហ៍នេះ70741
- ខែនេះ92621
- ឆ្នាំនេះ92621
- សរុប20535077